ലൂര്‍ദിലേക്ക് തീര്‍ത്ഥാടകരായി 12000 പട്ടാളക്കാര്‍
ബ്ര. ചെറിയാന്‍ സാമുവല്‍
(എക്‌സിക്യൂട്ടീവ് ഡയറക്ടര്‍ – യൂറോപ്പ് മരിയന്‍ ടൈംസ് വേള്‍ഡ് & മരിയന്‍ ടിവി)
ലൂര്‍ദ്: മാതാവിനെ കാണാന്‍ അവര്‍ കൂട്ടമായെത്തും. 40 രാജ്യങ്ങളില്‍ നിന്നുള്ള 12000 സൈനികരാണ് 61 ാം അന്താരാഷ്ട്ര സൈനിക തീര്‍ത്ഥാടനത്തിന്റെ ഭാഗമായി ഫ്രാന്‍സിലെ മരിയന്‍ തീര്‍ത്ഥാടന കേന്ദ്രമായ ലൂര്‍ദില്‍ എത്തിച്ചേരുക.
ലൂര്‍ദിലെ മരിയന്‍ പ്രത്യക്ഷീകരണത്തിന്റെ നൂറാം വാര്‍ഷികമായ 1958 ലാണ് അന്താരാഷ്ട്ര സൈനിക തീര്‍ത്ഥാടനം ആദ്യമായി ആരംഭിച്ചത്. സമാധാനം അന്വേഷിക്കുക. അതിനെ പിന്‍ചെല്ലുക എന്നതാണ് ഈ വര്‍ഷത്തെ തീര്‍ത്ഥാടനത്തിന്റെ ആപ്തവാക്യം.
വിവിധ ഭാഷകളിലുള്ള വി. കുര്‍ബാനകള്‍, സൈനികരുടെ കായിക വിനോദങ്ങള്‍, മെഴുകുതിരി കത്തിച്ചു പിടിച്ചു കൊണ്ടുള്ള മരിയന്‍ പ്രദക്ഷിണം എന്നിവയെല്ലാം അടങ്ങിയതാണ് സൈനിക തീര്‍ത്ഥാടനം. ലൂര്‍ദ് ഗ്രോട്ടോയുടെ സമീപത്തുള്ള ഉറവയും സൈനികര്‍ സന്ദര്‍ശിക്കും.
ഈ ദിവസങ്ങളില്‍ ലൂര്‍ദിന്റെ തെരുവുകളിലൂടെ മിലിട്ടറി ബാന്‍ഡ് മേളവും ഉണ്ടായിരിക്കും. വിവിധ രാജ്യങ്ങളില്‍ നിന്നുള്ള സൈനികര്‍ക്ക് പരസ്പരം അറിയാനും ആശയങ്ങളും അനുഭവങ്ങളും കൈമാറാനും ഇതൊരു സുവര്‍ണാവസരം ആയിരിക്കും.
