കുരിശോ ക്രൂശിതരൂപമോ?

ബ്ര. ചെറിയാന്‍ സാമുവല്‍
(എക്‌സിക്യൂട്ടീവ് ഡയറക്ടര്‍ – യൂറോപ്പ് മരിയന്‍ ടൈംസ് വേള്‍ഡ് & മരിയന്‍ ടിവി)

പല ക്രൈസ്തവ വിഭാഗങ്ങള്‍ ജീവിക്കുന്ന ഈ ലോകത്തില്‍ കത്തോലിക്കരെ വ്യത്യസ്തരാക്കുന്നത് ക്രൂശിത രൂപത്തിന്റെ ഉപയോഗമാണ്. എല്ലാ ക്രിസ്ത്യാനികളും ക്രൂശിത രൂപം ഉപയോഗിക്കുന്നവരല്ല. ക്രിസ്തുവുളള കുരിശാണ് ക്രൂശിത രൂപം അഥവാ Crucifix.

വെറും കുരിശിനെയല്ല കത്തോലിക്കര്‍ ആദരിക്കുന്നത്. കുരിശില്‍ മനുഷ്യവംശത്തിനു മുഴുവന്‍ വേണ്ടി ബലിയായി തീര്‍ന്ന യേശു ക്രിസ്തുവിനെയാണ്. അതിനാലാണ് ക്രിസ്തു തൂങ്ങിക്കിടക്കുന്ന ക്രൂശിതരൂപത്തെ നാം ആദരിക്കുന്നത്. അത് നമ്മുടെ രക്ഷയും സൗഖ്യവുമാണ്.

ആദ്യനൂറ്റാണ്ടുകളില്‍ കൊടിയ മതമര്‍ദനങ്ങള്‍ നിലനിന്നിരുന്ന കാലത്ത് ഗ്രീക്ക് അക്ഷരമാലയിലെ തൗ (T), റോ (P) എന്നിവ കുരിശിന് പകരം അതിന്റെ പ്രതീകമായി ഉപയോഗിച്ചിരുന്നു. ഇവ പരോക്ഷമായി കുരിശിനെ സൂചിപ്പിച്ചിരുന്നു.

എന്നാല്‍ റോമാ സാമ്രാജ്യത്തില്‍ ക്രിസ്തുമതത്തിന് ഔദ്യോഗിക അംഗീകാരം ലഭിച്ച ശേഷം കലാകാരന്‍മാര്‍ വ്യക്തമായി കുരിശിനെ ചിത്രീകരിക്കാന്‍ ആരംഭിച്ചു. നാം ക്രൂശിതനായ ക്രിസ്തുവുനെയാണ് പ്രഘോഷിക്കുന്നത് (1 കൊറി. 1: 23) എന്ന വി. പൗലോസ് അപ്പോസ്തലന്റെ വാക്കുകളാണ് നമ്മുടെ വിശ്വാസത്തിന്റെ ആധാരം.

ക്രിസ്തുവിന്റെ മഹത്തായ സ്‌നേഹമാണ് ഓരോ ക്രൂശിത രൂപവും പ്രകടമാക്കുന്നത്. അത് ക്രിസ്തുവിന്റെ സഹനങ്ങള്‍ ഓര്‍മിപ്പിക്കുന്നതോടൊപ്പം വരാനിരിക്കുന്ന ഉത്ഥാനത്തിന്റെ മഹത്വവും സൂചിപ്പിക്കുന്നു.