കുര്‍ബാനയ്ക്കിടെ പള്ളി ആക്രമണം. വൈദികനുള്‍പ്പെടെ ആറ് പേര്‍ മരിച്ചു
ബുര്‍ക്കിന ഫാസോ: ആഫ്രിക്കന്‍ രാജ്യമായ ബുര്‍ക്കിന ഫാസോയില്‍ അജ്ഞാതരായ ആക്രമികള്‍ ഡാബ്ലോ എന്ന സ്ഥലാത്തെ ഒരു പള്ളിക്കു നേരെ നടത്തിയ ആക്രമണത്തില്‍ കുര്‍ബാനയര്‍പ്പിച്ചു കൊണ്ടിരുന്ന പുരോഹിതന്‍ ഉള്‍പ്പെടെ ആറ് പേര്‍ കൊല്ലപ്പെട്ടു. അതിനു ശേഷം അക്രമികള്‍ പള്ളി അഗ്നിക്കിരയാക്കി.
മുപ്പതോളം വരുന്ന അക്രമി സംഘം വി. കുര്‍ബാനയ്ക്കായി ഡാബ്ലോയിലെ ദേവാലയത്തില്‍ കൂടിയിരുന്ന കത്തോലിക്കാ വിശ്വാസികളുടെ മേല്‍ ആക്രമണം അഴിച്ചു വിടുകയായിരുന്നു.
പള്ളി കൂടാതെ, സമീപത്തുള്ള ഒരു ആശുപത്രിയും കടകളും അക്രമികള്‍ തീയിട്ടു എന്ന് ബിബിസി റിപ്പോര്‍ട്ട് ചെയ്തു. ഡാബ്ലോയിലെ മേയര്‍ ഔസ്മാനേ സോംഗോ സംഭവത്തില്‍ നടുക്കം രേഖപ്പെടുത്തി. ഈ അടുത്തകാലത്തായി ഇസ്ലാം ജിഹാദി സംഘങ്ങളില്‍ നിന്ന് തുടര്‍ച്ചയായ ആക്രമണമാണ് ബുര്‍ക്കിന ഫാസോയിലെ ജനങ്ങള്‍ നേരിട്ടു കൊണ്ടിരിക്കുന്നത്.
