നന്മ എവിടെ നിന്നു വന്നാലും ആദരിക്കുക: ഫ്രാന്‍സിസ് പാപ്പാ
വത്തിക്കാന്‍: നന്മ ആരുടെ ഭാഗത്തു നിന്ന് വന്നാലും, അത് നമ്മുടെ കൂട്ടത്തിന് പുറമേ നിന്നും വന്നാല്‍ പോലും തുറന്ന മനസ്സോടെ സ്വീകരിക്കുവാന്‍ ഫ്രാന്‍സിസ് പാപ്പാ ആഹ്വാനം ചെയ്തു. ഈ ഞായറാഴ്ച വത്തിക്കാനിലെ സെന്റ് പീറ്റേഴ്‌സ് ചത്വരത്തില്‍ കര്‍ത്താവിന്റെ മാലാഖ പ്രാര്‍ത്ഥനയോടൊപ്പം നല്‍കിയ സന്ദേശത്തിലാണ് പാപ്പാ ഇത് പറഞ്ഞത്.
തങ്ങളുടെ കൂട്ടത്തിന് പുറമേയുള്ള ചിലര്‍ പിശാചുക്കളെ പുറത്താക്കുന്നു എന്ന പരാതിയുമായി ശിഷ്യന്മാര്‍ യേശുവിനെ സമീപിച്ച സുവിശേഷ ഭാഗം വായിച്ചു കൊണ്ടാണ് പാപ്പാ ഈ സന്ദേശം നല്‍കിയത്. ഇത് അടഞ്ഞ മനസ്സിന്റെ പ്രകടനമാണ്. നമ്മുടെതല്ലാത്ത ഒന്നിലും നന്മ കാണാന്‍ കഴിവില്ലായ്മയാണിത്. അതേ സമയം യേശു വളരെ സ്വതന്ത്ര മനസ്സോടെയാണ് പ്രതികരിക്കുന്നത്.
ദൈവാത്മാവിന്റെ സ്വാതന്ത്ര്യമാണ് നാം യേശുവില്‍ കാണുന്നത്. ദൈവത്തിന്റെ ആത്മാവിന് പരിധിയോ മതില്‍ക്കെട്ടുകളോ ബാധകമല്ല. ഈ ആന്തരിക സ്വാതന്ത്ര്യത്തെ കുറിച്ച് നമ്മെ ഓര്‍മിപ്പിക്കാന്‍ യേശു ഇന്നും ആഗ്രഹിക്കുന്നു, മാര്‍പാപ്പ പറഞ്ഞു.
ശിഷന്മാരുടെ സ്വഭാവം നാം പലയിടത്തും കാണുന്നു. നമ്മുടെ ഇടയില്‍ തന്നെ കാണുന്നു. വിവധ ക്രൈസ്തവ വിഭാഗങ്ങള്‍ക്കിടയില്‍ ഈ അടഞ്ഞ മനോഭാവമുണ്ട്. മനുഷ്യസഹജമായ സ്വഭാവമാണിത്. നമ്മുടേതുമായി യോജിച്ചു പോകാത്തതിനെ അംഗീകരിക്കാനുള്ള വൈമനസ്യമാണത്, പാപ്പാ വിശദമാക്കി.
ഒരാള്‍ നമ്മുടെ ശത്രുവാണോ മിത്രമാണോ, നമ്മുടെ കൂടെയുള്ളയാളാണോ പുറമേയുള്ളയാളാണോ എന്നൊന്നും ചിന്തിക്കാതെ അതിനെല്ലാ അപ്പുറത്തേക്ക് പോകാനും നന്മയെ അംഗീകരിക്കാനും യേശു നമ്മെ ഉദ്‌ബോധിപ്പിക്കുന്നു, പാപ്പ കൂട്ടിച്ചേര്‍ത്തു.
