ഡിട്രോയ്റ്റില്‍ ഇനി ഞായറാഴ്ച കായികവിനോദങ്ങളില്ല
ഡിട്രോയ്റ്റ്: ഞായറാഴ്ച ദിവസങ്ങള്‍ പ്രാര്‍ത്ഥനയ്ക്കും കുടുംബബന്ധങ്ങള്‍ക്കും വിശ്രമത്തിനും ഉള്ളതാണെന്നും ആ ദിവസങ്ങളില്‍ ഇനി മുതല്‍ കായികവിനോദങ്ങള്‍ ഉണ്ടായിരിക്കുന്നതല്ല എന്നും അമേരിക്കയിലെ ഡിട്രോയ്റ്റ് അതിരൂപത പ്രഖ്യാപിച്ചു.
2016 ലെ ഇടയലേഖനമായ അണ്‍ലീഷ് ദ ഗോസ്പല്‍ ധ്യാനിച്ചു കൊണ്ടുള്ള പുതിയ ഇടയലേഖനത്തിലാണ് കര്‍ത്താവിന്റെ ദിവസം ആചരിക്കുന്നതില്‍ കൂടുതല്‍ പ്രാധാന്യം കൊടുക്കണം എന്ന് ആവശ്യപ്പെട്ടു കൊണ്ട് അതിരൂപതാ ആര്‍ച്ച്ബിഷപ്പ് അലെന്‍ വിഞ്ഞോറെന്‍ പുതിയ തീരുമാനം അറിയിച്ചത്.
‘ഞായറാഴ്ചകള്‍ കര്‍ത്താവിനായി മാറ്റിവയ്ക്കപ്പെട്ടവയാണ്. അന്നേ ദിവസം കുടുംബത്തിനും കാരുണ്യപ്രവര്‍ത്തികള്‍ക്കുമായി ചെലവഴിക്കണം. ഈ കാലഘട്ടത്തില്‍ ഞായാറാഴ്ചയ്ക്ക് അതിന്റെ പവിത്രമായ പ്രാധാന്യം നഷ്ടമായിക്കൊണ്ടിരിക്കുകയാണ്. എന്നാല്‍ ഞായറാഴ്ച പവിത്രമായി ആചരിക്കാന്‍ ഡിട്രോയ്റ്റ് അതിരൂപത തീരുമാനിച്ചിരിക്കുന്നു’ ആര്‍ച്ച്ബിഷപ്പ് അലന്‍ പറഞ്ഞു.
