കെനിയയില്‍ കാണാതായ വൈദികന്റെ മൃതദേഹം കിട്ടി
തെക്കു കിഴക്കന്‍ കെനിയയില്‍ കാണാതായ കത്തോലിക്കാ പുരോഹിതന്റെ മൃതദേഹം ഒരു ശവകുടീരത്തില്‍ നിന്ന് കണ്ടെടുത്തു. ചാക്കില്‍ കെട്ടിയ നിലയിലായിരുന്നു മൃതശരീരം. 43 കാരനായ ഫാ. മൈക്കള്‍ മായിംഗി ക്യോംഗോയാണ് കൊല്ലപ്പെട്ടത്.
കഴുത്തു ഞെരിച്ചാണ് ഫാ. മൈക്കിള്‍ കൊല്ലപ്പെട്ടതെന്ന് പോലീസ് അറിയിച്ചു. മച്ചാക്കോസ് രൂപതയില്‍ പെട്ട താതാ ഇടവകയില്‍ സേവനം ചെയ്തു വരികയായിരുന്നു ഫാ. മൈക്കിള്‍.
കാണാതാകുന്നതിന് മുമ്പ് നയ്‌റോബിക്ക് 32 മൈല്‍ വടക്ക് സ്വന്ത ഭവനത്തില്‍ മാതാപിതാക്കളോടൊപ്പം താമസിക്കുകയായിരുന്നു ഫാ. മൈക്കിള്‍. ഒക്ടോബര്‍ 1 ന് വാര്‍ഷിക അവധിക്കായാണ് വീട്ടിലേക്ക് പോയത്.
25 കാരനായ ഒരാളില്‍ നിന്ന് ഫാ. മൈക്കളിന്റെ സെല്‍ഫോണും ക്രെഡിറ്റ് കാര്‍ഡും പോലീസ് കണ്ടെടുത്തിട്ടുണ്ട്. അന്വേഷണം പുരോഗമിക്കുന്നു.
