വത്തിക്കാനില്‍ ഒരാള്‍ക്ക് കൊറോണ സ്ഥിരീകരിച്ചു
വത്തിക്കാന്‍ സിറ്റി: വത്തിക്കാനില്‍ ഒരാള്‍ക്ക് കൊറോണ ബാധ റിപ്പോര്‍ട്ട് ചെയ്തു. വത്തിക്കാന്‍ വക്താവ് മത്തേയോ ബ്രൂണിയാണ് ഇക്കാര്യം അറിയിച്ചത്.
മാര്‍ച്ച് 5 നാണ് തൊഴില്‍ സംബന്ധമായ പരിശോധനയില്‍ ഒരാള്‍ക്ക് കൊറോണ ബാധിച്ചതായി തെളിഞ്ഞത്. ഇതിനെ തുടര്‍ന്ന് വത്തിക്കാന്‍ സിറ്റി സ്‌റ്റേറ്റിലെ ഹെല്‍ത്ത് ആന്‍ഡ് ഹൈജീന്‍ വിഭാഗത്തിലെ ഔട്ട്‌പേഷ്യന്റ് സേവനങ്ങള്‍ മാര്‍ച്ച് 6 ന് നിര്‍ത്തിവച്ചു.
വൈറസ് ഇറ്റലിയില്‍ എമ്പാടും പടര്‍ന്നു പിടിച്ച് സാഹചര്യത്തില്‍ വത്തിക്കാനില്‍ നടക്കാനിരിക്കുന്ന കോണ്‍ഫറന്‍സുകളും ഇവന്റുകളും മാറ്റിവച്ചിരിക്കുകയാണ്. വൈറസ് ബാധ തടയുന്നതിന് വേണ്ടിയാണ് ഈ നടപടികള്‍.
ചൈന ഒഴിച്ചു നിര്‍ത്തിയാല്‍ ഏറ്റവും കൂടുതല്‍ പേര്‍ കൊറോണ വൈറസ് ബാധ മൂലം മരണമടഞ്ഞ രാജ്യമാണ് ഇറ്റലി. മാര്‍ച്ച് 5 മുതല്‍ 15 വരെ ഇറ്റലിയിലെ സ്‌കൂളുകളും യൂണിവേഴ്‌സിറ്റികളും അടച്ചിരിക്കുകയാണ്.
