ചെന്നൈ സെന്റ് സെബാസ്റ്റിന്‍സ് ദേവാലയത്തിന്റെ പുനര്‍പ്രതിഷ്ഠ 10ന്
ചെന്നൈ: ചെന്നൈയിലെ സുപ്രസിദ്ധ തീര്‍ത്ഥാടന കേന്ദ്രമായ മാധവാരാം സെന്റ് സെബാസ്റ്റിന്‍സ് ദേവാലയത്തിന്റെ പുനര്‍പ്രതിഷ്ഠ നവംബര്‍ 10 ന് നടക്കും. ഫ്രാന്‍സിസ്‌കന്‍ പ്രൊവന്‍ഷ്യല്‍ സുപ്പീരിയര്‍ ഫാ. പ്രവീണ്‍ ഹെന്റി ഡിസൂസ ഉദ്ഘാടനം ചെയ്യും. മദ്രാസ്-മൈലാപ്പൂര്‍ ആര്‍ച്ച്ബിഷപ്പ് ജോര്‍ജ് അന്തോണിസാമി ദേവാലപ്രതിഷ്ഠ നിര്‍വഹിക്കും.
അത്ഭുതങ്ങള്‍ക്ക് പേരു കേട്ട ഈ ദേവാലയത്തിന്റെ ആധുനികവും സുന്ദരവും കലാഭംഗിയാര്‍ന്നതുമായ പുതിയ രൂപം ഭക്തര്‍ക്ക് സന്തോഷം പകരും എന്ന് ഇടവക വികാരി ഫാ. സൈമണ്‍ എ പറഞ്ഞു.
30 അടി ഉയരമുള്ള ഗംഭീരമായ ക്രിസ്തുരൂപമാണ് ദേവാലയത്തിലേക്ക് പ്രവേശിക്കുന്നവരെ സ്വാഗതം ചെയ്തു നിലകൊള്ളുന്നത്. വത്തിക്കാനിലെ സെന്റ് പീറ്റേഴ്‌സ് ബസിലിക്കയില്‍ ഉള്ളതു പോലെ ഇരു വശവും 12 അപ്പോസ്തലന്മാരുടെ രൂപവും സ്ഥാപിച്ചിട്ടുണ്ട്.
നാനാജാതിമതസ്ഥര്‍ ഈ ദേവാലയത്തില്‍ സന്ദര്‍ശനം നടത്താറുണ്ടെന്ന് ഫാ. സൈമണ്‍ വ്യക്തമാക്കി. വി. സെബാസ്റ്റിന്റെ തിരുനാള്‍ ദിനത്തില്‍ ഒരു ലക്ഷത്തിലേറെ ഭക്തര്‍ ഇവിടെ എത്തിച്ചേരാറുണ്ട്.
