കുമ്പസാരിച്ചു കഴിഞ്ഞാല്‍ ദൈവം നമ്മുടെ പാപങ്ങള്‍ മറക്കും: ഫ്രാന്‍സിസ് പാപ്പാ
വത്തിക്കാന്‍ സിറ്റി: കുമ്പസാരക്കൂട്ടില്‍ ക്ഷമിക്കപ്പെടുന്ന പാപങ്ങള്‍ ദൈവം മറന്നു കളയുമെന്ന് ഫ്രാന്‍സിസ് പാപ്പാ. ഞായറാഴ്ചത്തെ കര്‍ത്താവിന്റെ മാലാഖ പ്രാര്‍ത്ഥനയോടൊപ്പമുള്ള സന്ദേശം നല്‍കുകയായിരുന്നു, പാപ്പാ.
നമ്മള്‍ എങ്ങനെയാണ് പിശാചിനെ തോല്‍പിക്കുന്നത്? പാപ്പാ ചോദിച്ചു. ‘ദൈവത്തിന്റെ ക്ഷമ സ്വീകരിച്ചു കൊണ്ടാണ് നാം പിശാചിനെ തോല്‍പിക്കുന്നത്. ഓരോ തവണ നാം കുമ്പസാരക്കൂട്ടിലേക്ക് പോകുമ്പോഴും ഇത് സംഭവിക്കുന്നു. അവിടെ വച്ച് നാം നമ്മുടെ പാപങ്ങള്‍ ക്ഷമിക്കുന്ന പിതാവിന്റെ സ്‌നേഹം സ്വീകരിക്കുന്നു. പറഞ്ഞു കഴിഞ്ഞാല്‍ പിന്നെ ആ പാപം അവിടെയില്ല. അത് ദൈവം മറന്നു കഴിഞ്ഞു’ പാപ്പാ വിശദീകരിച്ചു.
ക്ഷമിക്കുമ്പോള്‍ ദൈവത്തിന് ഓര്‍മ നഷ്ടപ്പെടുന്നു. അവിടുന്ന് നമ്മുടെ പാപം മറന്നുകളയുന്നു. അവിടുന്നു നമ്മോട് വളരെ നല്ലവനാണ്, പാപ്പാ പറഞ്ഞു.
കുമ്പസാരക്കൂട്ടില്‍ വച്ച് ദൈവം നാം ഏറ്റു പറഞ്ഞ പാപങ്ങള്‍ മായ്ച്ചു കളയുന്നു. നമ്മെ ആന്തരികമായി നവീകരിക്കുന്നു, നാം ആനന്ദത്തില്‍ വീണ്ടും ജനിക്കുന്നു. പാപ്പാ വിശദീകരിച്ചു.
ഒരു പാപവും അന്തിമമല്ല എന്ന് പാപ്പാ പറഞ്ഞു. പാപികള്‍ എന്തു കൊണ്ടാണ് യേശുവിനോടു കൂടെ ഭക്ഷിക്കുന്നതെന്ന് ചോദിച്ച് ഫരിസേയര്‍ പരാതി പറയുന്ന സുവിശേഷഭാഗം വിശദീകരിച്ചു കൊണ്ട് സംസാരിക്കുകയായിരുന്നു പാപ്പാ.
യേശു പാപികളെ സ്വാഗതം ചെയ്യുകയും അവരോടൊപ്പം ഭക്ഷിക്കുകയും ചെയ്യുന്നു. ഇതാണ് വി. കുര്‍ബാനയില്‍ സംഭവിക്കുന്നത്, പാപ്പാ പറഞ്ഞു.
