കൊറോണക്കാലത്ത് പട്ടിണിയായ കുടുംബങ്ങള്‍ക്കായി പാപ്പായുടെ പ്രാര്‍ത്ഥന
വത്തിക്കാന്‍ സിറ്റി: കൊറോണ വൈറസ് വ്യാപനത്തിന്റെ പശ്ചാത്തലത്തിലുള്ള ലോക്ക് ഡൗണ്‍ മൂലം പട്ടിണിയിലായ കുടുംബങ്ങള്‍ക്കു വേണ്ടി പ്രാര്‍ത്ഥിക്കാന്‍ ഫ്രാന്‍സിസ് പാപ്പാ അഭ്യര്‍ത്ഥിച്ചു.
‘പല സ്ഥലങ്ങളിലും കൊറോണ പകര്‍ച്ചവ്യാധി മൂലമുണ്ടായ ഒരു ദുരിതം ഇതാണ്, അനേകം കുടുംബങ്ങള്‍ പട്ടിണിയായിരിക്കുന്നു. അവര്‍ക്ക് അന്നമില്ല’ പാപ്പാ പറഞ്ഞു. ഏപ്രില്‍ 23 ന് ദിവ്യബലി അര്‍പ്പിച്ച് പ്രാര്‍ത്ഥിക്കവേയാണ് പാപ്പാ ഇത് പറഞ്ഞത്. ‘ആ കുടുംബങ്ങള്‍ക്കും അവരുടെ അന്തസ്സിനും വേണ്ടി നമുക്ക് പ്രാര്‍ത്ഥിക്കാം’ അദ്ദേഹം കൂട്ടിച്ചേര്‍ത്തു.
പാവങ്ങള്‍ മറ്റൊരു പകര്‍ച്ചവ്യാധി മൂലം കഷ്ടപ്പെടുകയാണെന്ന് പാപ്പാ പറഞ്ഞു. സാമ്പത്തികമായ പരിണിതഫലങ്ങള്‍ മൂലം. കണ്ണില്‍ ചോരയില്ലാത്ത പലിശക്കാര്‍ പാവങ്ങളെ ചൂഷണം ചെയ്യുന്നു, പാപ്പാ വ്യക്തമാക്കി.
