കൊറോണ ബാധിച്ചു മരിച്ച അജ്ഞാതര്‍ക്കായി മാര്‍പാപ്പാ ദിവ്യബലി അര്‍പ്പിച്ചു
വത്തിക്കാന്‍ സിറ്റി: കൊറോണ വൈറസ് ബാധ മൂലം ജീവന്‍ നഷ്ടപ്പെട്ടവര്‍ക്കായി, പ്രത്യേകിച്ച് പൊതുശ്മശാനങ്ങളില്‍ മറവു ചെയ്യപ്പെട്ട അജ്ഞാതരായ ഇരകള്‍ക്കു വേണ്ടി ഫ്രാന്‍സിസ് പാപ്പാ ബലിയര്‍പ്പിച്ചു പ്രാര്‍ത്ഥിച്ചു.
കഴിഞ്ഞ രണ്ടു മാസങ്ങള്‍ക്കുള്ളില്‍ രണ്ടു ലക്ഷത്തിലേറെ പേരാണ് കോവിഡ് രോഗ ബാധ മൂലം മരണമടഞ്ഞത്. ഇറ്റലിയില്‍ മാത്രം 28000 ത്തോളം പേര്‍ മരണമടഞ്ഞു.
‘നമുക്കിന്ന് മരണമടഞ്ഞവരുടെ ആത്മശാന്തിക്കായി പ്രാര്‍ത്ഥിക്കാം. വളരെ പ്രത്യേകമായ ഊരും പേരും അറിയാത്ത മരിച്ചു പോയ അജ്ഞാതര്‍ക്കു വേണ്ടി പ്രാര്‍ത്ഥിക്കാം. പൊതുശ്മശാനങ്ങളുടെ ഫോട്ടോകള്‍ നമ്മള്‍ കണ്ടിട്ടുള്ളതാണല്ലോ’ ഫ്രാന്‍സിസ് പാപ്പാ ദിവ്യബലി മധ്യേ പറഞ്ഞു.
പ്രാര്‍ത്ഥനയും വ്യക്തിപരമായ സാക്ഷ്യവും വഴി നാം സുവിശേഷം പ്രസംഗിക്കണമെന്ന് പാപ്പാ ആവശ്യപ്പെട്ടു. ‘നമ്മുടെ സാക്ഷ്യം ജനങ്ങള്‍ക്കു മുന്നില്‍ വാതിലുകള്‍ തുറക്കും, നമ്മുടെ പ്രാര്‍ത്ഥന പിതാവിന്റെ ഹൃദയത്തിലേക്കുള്ള വാതിലും തുറക്കും’ പാപ്പാ പറഞ്ഞു.
ജീവിത സാക്ഷ്യം നല്‍കാതെ മതപരിവര്‍ത്തനം നല്‍കാന്‍ ശ്രമിക്കുന്നവരെ പാപ്പാ നിശിതമായി വിമര്‍ശിക്കുകയും ചെയ്തു.
