കൂകിപ്പായും ഹോസ്പിറ്റല്‍!
ഇത് രോഗികളുടെ അടുത്തേക്ക് ഓടിയെത്തുന്ന ആശുപത്രി. ഓടിയെത്തുന്നത് റെയില്‍ പാളത്തിലൂടെ. ഇതൊരു തീവണ്ടിയാണ്. ഇന്ത്യയില്‍ രോഗികള്‍ക്ക് ചികിത്സയുമായി എത്തുന്ന ഈ ട്രെയിനിന്റെ പേരാണ് ലൈഫ് ലൈന്‍ എക്‌സ്പ്രസ്.
1991 മുതല്‍ ഈ ലൈഫ് ലൈന്‍ എക്‌സ്പ്രസ് രോഗികളെ പരിചരിച്ചും രോഗങ്ങള്‍ സുഖമാക്കിയും ഓടിക്കൊണ്ടിരിക്കുന്നു. ഏറ്റവും അത്യാധുനിക മെഡിക്കല്‍ സജ്ജീകരണങ്ങളാണ് ഇതില്‍ ഒരുക്കിയിരിക്കുന്നത്. ആശുപത്രികളിലേക്ക് എത്തിച്ചേരാന്‍ കഴിയാത്തവര്‍ക്ക് ഈ തീവണ്ടി സൗജന്യ രോഗീപരിപാലനം നല്‍കുന്നു.
ഇന്ത്യന്‍ എന്‍ജിഒ ഇംപാക്ട് ഇന്ത്യ ഫൗണ്ടേഷന്‍ സ്ഥാപിച്ച ഈ തീവണ്ടി ഇതു വരെ രാജസ്ഥാന്‍ മുതല്‍ കര്‍ണാടക വരെ 12 ലക്ഷത്തോളം രോഗികള്‍ക്ക് ചികിത്സ എത്തിച്ചു കഴിഞ്ഞു. നീല നിറത്തില്‍ ഡിസൈന്‍ ചെയ്തിരിക്കുന്ന ഈ തീവണ്ടിയില്‍ 40 ഡോക്ടര്‍മാര്‍ സന്നദ്ധ സേവനം നല്‍കുന്നു. ഓരോ മാസവും ഓരോ നഗരങ്ങളിലേക്ക് സഞ്ചരിച്ചു കൊണ്ടാണ് ഇവര്‍ ചികിത്സ നല്‍കുന്നത്. ചികിത്സാ സൗകര്യങ്ങള്‍ കടന്നു ചെല്ലാത്ത ഗ്രാമങ്ങളാണ് ഇവരുടെ യഥാര്‍ത്ഥ ലക്ഷ്യം.
