സ്വര്‍ഗത്തിലേക്ക് കണ്ണുംനട്ട്…

ക്രിസ്തുവിന് തൻ്റെ ഇഹലോകജീവിതകാലത്ത്
താൻ എവിടെ നിന്നു വന്നു എന്നും,
എവിടേക്കു പോകുന്നുവെന്നും വ്യക്തമായ
ബോധ്യമുണ്ടായിരുന്നു.

കുരിശുമരണത്തോളം തന്നെ തന്നെ
താഴ്ത്തുവാൻ അവിടുന്ന് സ്വയം വിട്ടുകൊടുത്തതും….,
ശിഷ്യന്മാരുടെ പാദം കഴുകാൻ തക്കവിധം എളിമപ്പെട്ടതും അവൻ്റെ ഈ ബോധ്യത്തിൽ നിന്നുമായിരുന്നു .

ഇന്നല്ലെങ്കിൽ നാളെ അവസാനിക്കുന്ന
ഈ ലോകജീവിതത്തിൽ ക്ലേശങ്ങളും അപമാനങ്ങളും സഹനങ്ങളും ക്രിസ്തുവിനോടുള്ള സ്നേഹത്താൽ സന്തോഷത്തോടെ സ്വീകരിക്കുന്നതിന് ആനുപാതികമായി സ്വർഗത്തിലെ മഹത്വവും ആനന്ദവും വർദ്ധിച്ചു കൊണ്ടിരിക്കുമെങ്കിൽ കൂടുതൽ സഹനങ്ങൾ സ്വീകരിക്കാൻ നാം മടിക്കുന്നതെന്തിന്…?

” എന്നെ പ്രതി മനുഷ്യർ നിങ്ങളെ അവഹേളിക്കുകയും പീഡിപ്പിക്കുകയും എല്ലാ വിധ തിന്മകളും നിങ്ങൾക്കെതിരെ വ്യാജമായി പറയുകയും ചെയ്യുമ്പോൾ നിങ്ങൾ ഭാഗ്യവാന്മാർ;
നിങ്ങൾ ആനന്ദിച്ചാഹ്ലാദിക്കുവിൻ.
സ്വർഗത്തിൽ നിങ്ങളുടെ പ്രതിഫലം വലുതായിരിക്കും “
( മത്തായി 5 :11, 12 )

ജീവിത വഴികളിലെ സഹനങ്ങളിൽ
പതറാതെ ജീവിക്കാനും….
ഭൂമിയോളം താഴാനും എളിമപ്പെടാനും,
പ്രിയപ്പെട്ടവരുടെ മരണത്തിൽ മനസു വിതുമ്പുമ്പോഴും ആത്മാവിൽ ആനന്ദിക്കാൻ
സ്വർഗത്തെക്കുറിച്ചുള്ള ഈ പ്രത്യാശ
നമുക്ക് തുണയാകട്ടെ.

” നമുക്കു വെളിപ്പെടാനിരിക്കുന്ന മഹത്വത്തോടു തുലനം ചെയ്യുമ്പോൾ ഇന്നത്തെ കഷ്ടതകൾ നിസാരമാണ്. “
( റോമാ 8:18 )

~ Jincy Santhosh ~

മരിയന്‍ ടൈംസിലെ ഇന്നത്തെ പ്രധാനപ്പെട്ട അപ്ഡേറ്റുകള്‍ താഴെ ലഭിക്കുന്നതാണ്.