നൈജീരിയന്‍ സെമിനാരിക്കാരിലൊരാള്‍ കൊല്ലപ്പെട്ടു
സൊക്കോട്ടോ: കഴിഞ്ഞ മാസം നൈജീരിയയിലെ കഡുന ഗുഡ് ഷെപ്പേര്‍ഡ് സെമിനാരിയില്‍ നിന്ന് അക്രമികള്‍ തട്ടിക്കൊണ്ടു പോയ നാല് സെമിനാരിക്കാരില്‍ ഒരാള്‍ കൊല്ലപ്പെട്ടതായി റിപ്പോര്‍ട്ട്. മൂന്നു പേരെ കഴിഞ്ഞ ദിവസം മോചിപ്പിച്ചതായി വാര്‍ത്ത വന്നതിന്റെ പിന്നാലെയാണ് ദുഖ വാര്‍ത്ത എത്തിയത്.
‘ദുഖഭാരം നിറഞ്ഞ ഹൃദയത്തോടെ ഞാനൊരു കാര്യം അറിയിക്കാന്‍ ആഗ്രഹിക്കുന്നു. ഞങ്ങളുടെ പ്രിയ പുത്രന്‍ മൈക്കളില്‍ കൊള്ളക്കാരുടെ കൈകളാല്‍ കൊല്ലപ്പെട്ടു. എന്നാണെന്ന് കൃത്യമായി പറയാന്‍ നിര്‍വാഹമില്ല.’ സൊക്കോത്തയിലെ ബിഷപ്പ് മാത്യു ഹസ്സന്‍ കുക്കാഹ് പ്രസ്താവനയില്‍ പറഞ്ഞു.
കൊല്ലപ്പെട്ട സെമിനാരിക്കാരന്‍ മൈക്കിള്‍ എന്‍നാദിക്ക് 18 വയസ്സുണ്ടായിരുന്നു. ജനുവരി 8 നാണ് സെമിനാരിക്കാരെ അക്രമികള്‍ കഡുന ഗുഡ് ഷെപ്പേര്‍ഡ് സെമിനാരിയില്‍ നിന്ന് തട്ടിക്കൊണ്ടു പോയത്.
