ഈ ജീവിതം വിശുദ്ധിയാൽ ധന്യമാകട്ടെ

ആരാണ് പുരോഹിതൻ?
“ലോക സുഖങ്ങൾ ആഗ്രഹിക്കാതെ ലോകത്തിൽ ജീവിക്കുന്നവൻ.
ഒരു കുടുംബത്തിൻ്റെയും സ്വന്തമാകാതെ ഓരോ കുടുബത്തിലും അംഗമാകുന്നവൻ.
എല്ലാ ദുഃഖങ്ങളിലും പങ്കു ചേരുന്നവൻ.
എല്ലാ ഹൃദയ രഹസ്യങ്ങളിലേയ്ക്കും
കടന്ന് ചെല്ലുന്നവൻ.
എല്ലാ വൃണങ്ങളും വചനത്താൽ സുഖപ്പെടുത്തുന്നവൻ.
മനുഷ്യരിൽ നിന്ന് പുറപ്പെട്ട് അവരുടെ പ്രാർത്ഥനകൾ ദൈവസന്നിധിയിലെത്തിക്കുന്നവൻ.
ദൈവത്തിൽ നിന്ന് മടങ്ങി മനുഷ്യർക്ക് പാപമോചനവും സമാധാനവും പ്രത്യാശയും കൊണ്ടുവരുന്നവൻ.
പര സ്നേഹത്താൽ ജാലിക്കുന്നതും
ബ്രഹ്മചര്യത്തിൽ സദൃഢവുമായ ഹൃദയമുള്ളവൻ.
എല്ലായ്പ്പോഴും ക്ഷമിക്കുകയും പഠിപ്പിക്കുകയും ആശ്വസിപ്പിക്കുകയും അനുഗ്രഹിക്കുകയും ചെയ്യുന്നവൻ.”

ഓ!!! ദൈവമേ…
എത്ര ഉത്കൃഷ്ടമായ ജീവിതം.
യേശുക്രിസ്തുവിൻ്റെ പുരോഹിതാ …
ഈ ജീവിതം വിശുദ്ധിയാൽ ധന്യമാകട്ടെ.

~ Jincy Santhosh ~

വൈദികരുടെ മധ്യസ്ഥനായ വി. ജോൺ മരിയ വിയാനിയോടുള്ള പ്രാര്‍ത്ഥന

ഓ! വി. ജോൺ മരിയ വിയാനി, അങ്ങയുടെ ഇടവകയിൽ സാമൂഹ്യ തിന്മകളും പാപങ്ങളും അവിടുന്ന് കാണാനിടയായപ്പോൾ, കുമ്പസാരക്കൂട്ടിലെ ശുശ്രൂഷകളിലൂടെയും, സുവിശേഷ പ്രസംഗങ്ങളിലൂടെയും ആത്മീയ നവീകരണത്തിന്റെ ജ്വാലകൾ അങ്ങ് പകർന്നു കൊടുക്കുകയുണ്ടായല്ലോ? ദൈവകൃപയിൽ ആശ്രയിച്ച് ആത്മാക്കളെ നേടുവാനായി അങ്ങ് നടത്തിയ വിട്ടുവീഴ്ചയില്ലാത്ത പ്രയത്നങ്ങൾ അനേകരുടെ മാനസാന്തരത്തിന് കാരണമായി. എന്നെപ്പോലെ അനേകം പാപികളെ അങ്ങയുടെ മൃദു വചനങ്ങളാൽ മാനസാന്തരപ്പെടുത്തുവാൻ അങ്ങേക്ക് സാധിച്ചു.

ഓ! വി. ജോൺ മരിയ വിയാനി, പാപത്തോട് അങ്ങേക്കുണ്ടായിരുന്ന അതേ മനോഭാവവും, പാപികളോട് അങ്ങേക്കുണ്ടായിരുന്ന അതിയറ്റ അനുകമ്പയും എനിക്കും ഉണ്ടാകുവാൻ അങ്ങ് എനിക്ക് വേണ്ടി നമ്മുടെ കർത്താവായ ദൈവത്തോട് പ്രാർത്ഥിക്കണമേ. എന്റെ സഹോദരങ്ങൾക്ക് ഒരിക്കലും മുറിവേൽക്കാത്ത രീതിയിൽ എന്റെ വാക്കുകൾ ഉപയോഗിക്കുവാൻ അവിടുന്ന് എനിക്കു പ്രത്യേക വരം ഈശോയിൽ നിന്നും വാങ്ങിത്തരേണമെ. കൂദാശകളുടെ യോഗ്യമായ സ്വീകരണത്തിലൂടെ സ്വർഗീയ പിതാവുമായി സദാ രമ്യതയിൽ ആയിരിക്കുവാൻ എന്റെ ഹൃദയത്തെ പ്രചോദിപ്പിക്കണമെ.

അങ്ങയുടെ ശക്തമായ മദ്ധ്യസ്ഥ ശക്തിയിൽ അടിയുറച്ച് വിശ്വസിച്ചു കൊണ്ട് ഞങ്ങൾ പ്രാർത്ഥിക്കുന്നു. ഈ പ്രാർത്ഥനയിലൂടെ ഞങ്ങൾ സമർപ്പിക്കുന്ന ഈ പ്രത്യേക ആവശ്യം (ഇവിടെ ആവശ്യം പറയുക………) ഈശോയിൽ നിന്നും ഞങ്ങൾക്ക് നേടി തരണമേ.

വിശുദ്ധ ജോൺ മരിയ വിയാനി, വൈദികരുടെ മധ്യസ്ഥാ, എല്ലാ വൈദികർക്കും വേണ്ടി പ്രാർത്ഥിക്കണമേ..
ആമേൻ

1സ്വർഗ്ഗ. 1നന്മ. 1ത്രിത്വ.

മരിയന്‍ ടൈംസിലെ ഇന്നത്തെ പ്രധാനപ്പെട്ട അപ്ഡേറ്റുകള്‍ താഴെ ലഭിക്കുന്നതാണ്.