ഉയിര്‍പ്പു കാത്തൊരു ഉറക്കം

നമ്മുടെ ശരീരത്തെക്കുറിച്ച് നമുക്ക് വ്യക്തമായ ഒരു ബോധ്യം നല്കുന്ന പ്രാർത്ഥനകളാണ് കത്തോലിക്കാ സഭയിലെ മൃതസംസ്കാര ശുശ്രൂഷയിലുള്ളത്.

അതിൽ, സെമിത്തേരിയിൽ വച്ച് കല്ലറ/ കുഴി വെഞ്ചരിപ്പ് പ്രാർത്ഥന എല്ലാ ക്രിസ്ത്യാനികൾക്കും ഒരു ധ്യാന വിഷയമാണ്.
വൈദികൻ കുഴി വെഞ്ചരിപ്പു പ്രാർത്ഥന ഇപ്രകാരം ചൊല്ലുന്നു.
“മാമ്മോദീസായാൽ മുദ്രിതവും,
പരിശുദ്ധ കുർബാനയാൽ പരിപുഷ്ടവും,
വിശുദ്ധതൈലത്താൻ അഭിഷിക്തവുമായ ഈ ശരീരത്തിന് ,
കർത്താവിൻ്റെ രണ്ടാമത്തെ ആഗമനം വരെ,
വിശ്രമം കൊള്ളേണ്ട ഈ കബറിടം ആശീർവ്വദിക്കണമെ… ”

എത്രമാത്രം പരിശുദ്ധിയോടെ ഓരോരുത്തരും തങ്ങളുടെ ശരീരത്തെ കാത്തുസൂക്ഷിക്കണം എന്ന വലിയ ഉത്തരവാദിത്ത്വം ഈ പ്രാർത്ഥന നമ്മെ ഓർമ്മിപ്പിക്കുന്നുണ്ട്.

പിതാവിൻ്റെയും പുത്രൻ്റെയും പരിശുദ്ധാത്മാവിൻ്റെയും നാമത്തിൽ മുദ്രിതമായതും, പരിശുദ്ധ കുർബാന സ്വീകരണത്തിലൂടെ ക്രിസ്തുവിൻ്റെ തിരുശരീര രക്തങ്ങളാൽ പരിപോഷിപ്പിക്കപ്പെട്ടതും, കർത്താവിൻ്റെ രണ്ടാമത്തെ ആഗമനത്തിൻ്റെ കാഹളം മുഴങ്ങുമ്പോൾ നിത്യജീവിതത്തിനായി ഉയിർത്തെഴുന്നേല്ക്കണ്ടതുമായ ഈ ശരീരത്തെ പ്രതി ക്രിസ്ത്യാനി അഭിമാനിക്കണം.

“ഭൂമിയിലെ പൊടിയില്‍ ഉറങ്ങുന്ന അനേകര്‍ ഉണരും; ചിലര്‍ നിത്യജീവനായും, ചിലര്‍ ലജ്‌ജയ്‌ക്കും നിത്യനിന്‌ദയ്‌ക്കുമായും.”
(ദാനിയേല്‍ 12 : 2)

പഴയ നിയമത്തിൽ കല്ലും മണ്ണും കൊണ്ട് നിർമിച്ച ദേവാലയം,
പുതിയ നിയമ ഭാഷ്യത്തിൽ ദൈവത്തിൻ്റെ ഛായയിലും സാദൃശ്യത്തിലും സൃഷ്ടിക്കപ്പെട്ട മനുഷ്യ ശരീരമാണ്.
അത് കർത്താവ് വില കൊടുത്ത് വാങ്ങിയതാണ്.
“നിങ്ങൾ നിങ്ങളുടെ സ്വന്തമല്ല.
നിങ്ങൾ വിലയ്ക്കു വാങ്ങപ്പെട്ടവരാണ്.”
( 1 കോറിന്തോസ് 6 : 20 )

ദൈവാലയത്തെ വിശുദ്ധമായും ആദരവോടെയും കാണുന്ന നമ്മൾ
സ്വന്ത ശരീരത്തെയും അതേ വിശുദ്ധിയിലും ആദരവിലും കാത്തുസൂക്ഷിക്കണം

ഉയർന്ന വില കൊടുത്ത് വാങ്ങിയത് ഏറ്റവും ശ്രേഷ്ഠമായി സൂക്ഷിക്കണ്ടത് ആവശ്യവുമാണ്.
ദേവാലയത്തിന് നൽകുന്ന ആദരവ്
ശരീരത്തിനും നൽകിയാൽ….
വിശുദ്ധി നിനക്ക് കൈയ്യെത്തും ദൂരത്താണ്.

~ Jincy Santhosh ~

മരിയന്‍ ടൈംസിലെ ഇന്നത്തെ പ്രധാനപ്പെട്ട അപ്ഡേറ്റുകള്‍ താഴെ ലഭിക്കുന്നതാണ്.