ക്രിസ്ത്വനുകരണം അധ്യായം 4
അനുദിന വിവേകം
എല്ലാ വാക്കും പ്രേരണയും വിശ്വസിക്കരുത്. ദൈവത്തെ മുന്‍നിറുത്തി വളരെ ശ്രദ്ധിച്ച് ആലോചിച്ചു മാത്രമാണ് ചെയ്യേണ്ടത്. നമ്മള്‍ എത്ര ദുര്‍ബലരാണ്. പലപ്പോഴും ഇതരരുടെ കുറ്റങ്ങള്‍ എളുപ്പം വിശ്വസിക്കുകയും പറയുകയും ചെയ്യുന്നു. നല്ല മനുഷ്യര്‍ എല്ലാ കഥകളും എളുപ്പം വിശ്വസിക്കാറില്ല. മാനുഷിക ദൗര്‍ബല്യവും ദുഷ്പ്രവണതകളും സംസാരത്തിലെ പിഴവുകളും അവര്‍ക്കറിയാം.
സുകൃതം ഒരുവനെ വിവേകിയാക്കുന്നു
ചെയ്തികളില്‍ ധൃതി കൂട്ടാത്തത്, സ്വന്തം അഭിപ്രായങ്ങളില്‍ കടുംപിടുത്തം ഇല്ലാത്തത് വലിയ വിവേകമാണ്. എല്ലാവരെയും എളുപ്പം വിശ്വസിക്കാത്തതും കേള്‍ക്കുന്നവ ഉടനെ ഇതരരോട് പറയാത്തതും അങ്ങനെ തന്നെ. മനസ്സാക്ഷിയുള്ള വിജ്ഞാനിയായ മനുഷ്യന്റെ ഉപദേശം തേടണം. സ്വന്തം അഭിപ്രായങ്ങളനിസരിച്ച് ചെയ്യാതെ അറിവുള്ളവരുടെ ആലോചന ഇഷ്ടപ്പെടണം. ഉത്തമമായ ജീവിതം മനുഷ്യനെ ദൈവ തിരുമുമ്പില്‍ ജ്ഞാനിയാക്കുന്നു. പല കാര്യങ്ങളിലും വിദഗ്ദനും സ്വയം എത്ര താഴുന്നുവോ, ദൈവത്തിന് എത്ര കീഴ്‌പ്പെടുന്നുവോ അത്രയും എല്ലാറ്റിലും ജ്ഞാനിയും ശാന്തശീലനും ആകും.
