വചനം മാനവഹൃദയങ്ങളെ നവീകരിക്കും: ഏബ്രഹാം മാർ യൂലിയോസ്
കൊച്ചി: മാനവഹൃദയങ്ങളെ നവീകരിക്കുകയും ശക്തിപ്പെടുത്തുകയും ചെയ്യുന്നതാണു ദൈവവചനമെന്നു കെസിബിസി ബൈബിൾ സൊസൈറ്റി ചെയർമാൻ ബിഷപ് ഏബ്രഹാം മാർ യൂലിയോസ് പറഞ്ഞു. കെസിബിസി ബൈബിൾ സൊസൈറ്റിയുടെ സംസ്ഥാനതല ലോഗോസ് ബൈബിൾ ക്വിസ് ഗ്രാൻഡ് ഫിനാലെയുടെ പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. വചനം അനേകരിൽ എത്തിക്കാൻ ലോഗോസ് ബൈബിൾ ക്വിസിന് സാധിക്കുന്നുണ്ട്. ബധിരർക്കായി സംഘടിപ്പിക്കപ്പെട്ട ബൈബിൾ ടിവി ക്വിസിലൂടെ ഏവരും ദൈവത്തിനു പ്രിയപ്പെട്ടവരാണെന്ന സന്ദേശം ഉച്ചത്തിൽ പ്രഘോഷിക്കാൻ സാധിച്ചുവെന്നും അദ്ദേഹം പറഞ്ഞു.
ലോഗോസ് പ്രതിഭയ്ക്കു തൊടുപുഴ കണ്ടിരിക്കൽ ട്രാവൽസ് സ്പോണ്സർ ചെയ്യുന്ന വിശുദ്ധനാടു സന്ദർശനം, 25000 രൂപയുടെ പാലയ്ക്കൽ തോമ്മാ മല്പാൻ കാഷ് അവാർഡ് എന്നീ സമ്മാനങ്ങൾ ബിഷപ് മാർ യൂലിയോസ് വിതരണം ചെയ്തു. വിവിധ പ്രായവിഭാഗങ്ങളിലെ വിജയികൾക്കും കാഷ് അവാർഡുകൾ സമ്മാനിച്ചു. കേരള കാത്തലിക് ബൈബിൾ സൊസൈറ്റി ഏർപ്പെടുത്തിയ മാർ ജോർജ് പുന്നക്കോട്ടിൽ വചനസർഗ പ്രതിഭാപുരസ്കാരം ഫാ. ഷാജി തുന്പേച്ചിറയിലിനു സമർപ്പിച്ചു.
കെസിബിസി ഡപ്യൂട്ടി സെക്രട്ടറി റവ. ഡോ. വർഗീസ് വള്ളിക്കാട്ട്, ബൈബിൾ സൊസൈറ്റി സെക്രട്ടറി റവ. ഡോ. ജോണ്സണ് പുതുശേരി വൈസ് ചെയർമാൻ ജിസ്മോൻ തുടിയൻപ്ലാക്കൽ, ജോയിന്റ് സെക്രട്ടറി കൊച്ചുത്രേസ്യ സൈമണ്‍ എന്നിവർ പ്രസംഗിച്ചു.
